Gürcüstan hökuməti Rusiyadan un, arpa və kəpək idxalına tətbiq edilən müvəqqəti rüsumun müddətini qeyri-müəyyən müddətə uzadıb.
AZƏRTAC xəbər verir ki, bu barədə Gürcüstan hökumət administrasiyasından məlumat verilib.
Bildirilib ki, taxıl məhsuluna tələbat olmadığından onu satmaqda problem yaşayan gürcü fermerlərinə dəstək məqsədilə Gürcüstan 2023-cü ilin yayından un, arpa və kəpək idxalına müvəqqəti rüsum tətbiq edib və bu müddət bir neçə dəfə uzadılıb.
Hökumətin bu il fevralın 28-də qəbul etdiyi qərara əsasən, 200 kiloqramdan artıq buğda ununun idxalına indi 0,25 lari deyil, kiloqramı üçün 0,3 lari (tonuna 300 lari) vergi tutulur. 200 kiloqramdan artıq arpa və kəpəyin idxalına indi hər kiloqramı 0,1 lari deyil, 0,2 lari vergi tutulur.
Qeyd edək ki, əvvəlcə unun idxalına tətbiq olunan rüsum 2023-cü il noyabrın 1-dək qüvvədə idi, sonra isə 2024-cü il sentyabrın 1-dək uzadıldı. Sonuncu qərara əsasən rüsum tətbiqi 2025-ci il aprelin 1-dək uzadılmışdı.
Hökumət bəyan edib ki, rüsumun tətbiq edilməsində məqsəd gürcü buğdasının rəqabət qabiliyyətini artırmaq və yerli bazarda satışını asanlaşdırmaqdır. Hökumət bu qərarı sektorun çörəyin bahalaşmasına imkan verməməsi şərti ilə qəbul edib.
Lakin çörək istehsalçıları onun ləğvini tələb edirlər, çünki onların fikrincə, son vaxtlar dünya bazarlarında unun bahalaşması ölkədə çörəyin bahalaşmasına səbəb ola bilər.
